რა არის მენოპაუზა?

მენოპაუზა დიდი ხანის განმავლობაში დაკავშირებული იყო დაბერების პროცესთან და მიმზიდველობის დაკარგვასთან. მენოპაუზა არ არის დაავადება. ეს არის ბუნებრივი პროცესი ქალის ცხოვრებაში. ჩვენ გეტყვით ყველაფერს, რაც უნდა იცოდეთ მენოპაუზის შესახებ.

რას ნიშნავს მენოპაუზა?

 "მენოპაუზა" უბრალოდ თქვენი მენსტრუალური ციკლის შეწყვეტაა ერთი წლის განმავლობაში, მაგრამ სიტყვა "მენოპაუზა" ხშირად გამოიყენება პერიმენოპაუზის, მენოპაუზის წინა პერიოდის დროს. პერიმენოპაუზა არის პერიოდი, როდესაც ქალის ძირითადი ჰორმონები (ესტროგენი და პროგესტერონი) იწყებს აწევას და ვარდნას არარეგულარულად. საშუალოდ, პერიმენოპაუზა გრძელდება დაახლოებით ოთხი წელი, თუმცა ზოგიერთ ქალში ის შეიძლება გაგრძელდეს 12 წლამდე. თქვენ შეამჩნევთ პერიმენოპაუზის ნიშნებს ორმოცი ან თუნდაც ოცდაათ წლის ასაკში, ხოლო მენოპაუზა ჩვეულებრივ იწყება 45-დან 55 წლამდე ასაკში.

რატომ იწყება მენოპაუზა?

ეს იმიტომ ხდება, რომ თქვენი საკვერცხეების ფოლიკულების მარაგი - რომელიც საჭიროა კვერცხუჯრედის შესაქმნელად - იწურება. თქვენი საკვერცხეები ნაკლებად რეაგირებენ რეპროდუქციულ ჰორმონებზე, როგორიცაა ფოლიკულის მასტიმულირებელი ჰორმონი, რაც იმას ნიშნავს, რომ ისინი წყვეტენ ესტროგენისა და პროგესტერონის გამომუშავებას, რაც იწვევს მენოპაუზის სიმპტომებს.

რა არის მენოპაუზის ყველაზე გავრცელებული სიმპტომები?

ყველა ქალს შეიძლება არ აღენიშნებოდეს ეს სიმპტომები. აქ არის მენოპაუზის ყველაზე გავრცელებული სიმპტომები და როგორ გავუმკლავდეთ მათ:

მენსტრუალური ცვლილებები

თქვენი ციკლის ხანგრძლივობის (ციკლი უფრო ხანმოკლე ან ხანგრძლივი ხდება) ცვლილება შეიძლება მიუთითებდეს, რომ ადრეულ პერიმენოპაუზას გადიხართ. მენსტრუალურ ციკლებს შორის 60 დღის ან მეტი მონაკვეთის არსებობა პერიმენოპაუზის მაჩვენებელია. ცვლილებები გამოწვეულია იმით, რომ ოვულაცია ხდება არაპროგნოზირებადი, რადგან თქვენი კვერცხუჯრედის მარაგი მცირდება.

რა შეგიძლიათ გააკეთოთ: ეს მენოპაუზის გარდამავალი ნაწილია, მაგრამ მიმართეთ ექიმს, თუ მენსტრუაცია ძალიან შემაწუხებელია.

ალები

ალები, წამოხურება და ღამის ოფლიანობა ერთობლივად ცნობილია, როგორც "ვაზომოტორული სიმპტომები" და გავლენას ახდენს ქალების 60-დან 85%-ზე, განსხვავებული სიმძიმით და სიხშირით. ისინი, როგორც წესი, გრძელდება დაახლოებით ორი წელი, მაგრამ ქალების 10% -ში შეიძლება გაგრძელდეს 15 წლამდე. ექსპერტებმა ჯერ კიდევ არ იციან ზუსტად რა იწვევს მათ, მაგრამ ფიქრობენ, რომ ჰორმონების ცვლილებები გავლენას ახდენს იმაზე, თუ როგორ აკონტროლებს ტვინი სხეულის ტემპერატურას.

რა შეგიძლიათ გააკეთოთ:

- ჰკითხეთ თქვენს ექიმს ჰორმონის ჩანაცვლებითი თერაპიის შესახებ (HRT) – HRT ანაცვლებს თქვენს ჰორმონებს და არის ვაზომოტორული სიმპტომების შეჩერების ყველაზე ეფექტური გზა, რადგან ის მკურნალობს გამომწვევ მიზეზს. HRT-ის მიღებამ ასევე შეიძლება შეამციროს ისეთი პირობების რისკი, როგორიცაა გულის დაავადება და ოსტეოპოროზი, რაც იზრდება პოსტ-მენოპაუზის დროს.

- მენოპაუზის დროს შეგიძლიათ გამოიყენოთ სიმპტომების დასაძლევად ისეთი საშუალებები, როგორიცაა ხეპილპილა (Agnus Castus), წითელი სამყურა ან სოიოს იზოფლავონები.

- ბოჭკოს მიღებამ ან სტრესის შემცირეებამ ასევე შეიძლება გავლენა მოახდინოს ალებზე.

- შეამცროთ ან ამოიღოთ კების რაციონიდან ცხარე საკვები და ალკოჰოლი, რადგან ისინი აძლიერებენ ალებს.

ხასიათის ცვლილების პრობლემები

შფოთვა და დეპრესია მოქმედებს ქალებზე პერიმენოპაუზის დროს. ჰორმონის დონის ცვლილებამ შეიძლება გავლენა მოახდინოს ნეიროტრანსმიტერებზე, როგორიცაა სეროტონინი, რომელიც აკონტროლებს განწყობას.

რა შეგიძლიათ გააკეთოთ: დეპრესიის და შფოთვის შესამსუბუქებლად შეგიძლიათ დაკავდეთ იოგით, მედიტაციით ან რეგულარული ვარჯიშით. მიჩნეულია რომ კრაზანა და ვალერიანი ეხმარება შფოთვის შემცირებას.

სექსუალური საკითხები

ესტროგენის დონის დაქვეითებამ შეიძლება გამოიწვიოს საშოს კედლის სიმშრალე და გათხელება, რაც იწვევს მიდრეკილებას ინფექციებისკენ ან ხდის სქესობრივი კავშირს არასასიამოვნოს. თქვენ ასევე შეიძლება განიცადოთ გაღიზიანება და ტკივილი მაშინაც კი თუ არ ხართ სექსუალურად აქტიური. გარდა ამისა, შეიძლება აღმოაჩინოთ, რომ დაქვეითებული გაქვთ ლიბიდო.

 რა შეგიძლიათ გააკეთოთ: ვაგინალური სიმშრალე შეიძლება ძალიან მარტივად განიკურნოს ადგილობრივი მოქმედების ჰორმონის შემცველი საშუალების ან ვაგინალური ლუბრიკანტის ( დამატენიანებელი) გამოყენებით.

პოსტ-მენოპაუზა

მენოპაუზის შემდეგ, ესტროგენის ნაკლებობა ნიშნავს, რომ თქვენ უფრო მგრძნობიარე ხართ ოსტეოპოროზისა და გულის დაავადებების მიმართ. ასევე შეიძლება მოიმატოთ წონაში ან კანი გამოგიშრეთ. თქვენ შეგიძლიათ გაიუმჯობესოთ ძვლების ჯანმრთელობა კაცლიუმის და D ვიტამინის მიღებით. ასევე შეგიძლიათ მიიღოთ ომეგა-3, რომელიც ამცირებს გულ-სისხლძარღვთა დაავადებების რისკს და ებრძვის კანის სიმშრალეს.

ჩვენი რჩევები მხოლოს ინფორმაციის მიღების მიზნისთვის არის. გთხოვთ, მიმართოთ თქვენს ექიმს დანამატების მიიღებამდე.